2-வது 20 ஓவர் கிரிக்கெட்: இந்தியா-அயர்லாந்து அணிகள் இன்று மோதல்

இந்தியா-அயர்லாந்து அணிகள் இடையிலான முதலாவது 20 ஓவர் கிரிக்கெட் போட்டி டப்ளினில் நேற்று முன்தினம் நடந்தது. 'டாஸ்' ஜெயித்த இந்திய அணியின் கேப்டன் ஹர்திக் பாண்ட்யா பீல்டிங்கை தேர்வு செய்தார்.

ஆட்டம் தொடங்கும் முன்பே மழை குறுக்கிட்டதால் 2 மணி நேரம் தாமதமாக ஆரம்பமானது. அத்துடன் போட்டி 12 ஓவர்கள் கொண்டதாக குறைக்கப்பட்டது. முதலில் பேட் செய்த அயர்லாந்து அணிக்கு ஆரம்பமே அதிர்ச்சி காத்து இருந்தது. கேப்டன் ஆன்டி பால்பிர்னி (0), பால் ஸ்டிர்லிங் 4 ரன்னிலும், காரெத் டெலானி 8 ரன்னிலும் அடுத்தடுத்து ஆட்டம் இழந்தனர்.

இதனால் அந்த அணி 22 ரன்னுக்குள் 3 விக்கெட்டுகளை (3.5 ஓவர்களில்) இழந்து தத்தளித்தது. 4-வது வீரராக களம் கண்ட ஹாரி டெக்டர் நிலைத்து நின்று ஆடி அணியின் ஸ்கோர் மூன்று இலக்கத்தை எட்ட வழிவகுத்தார். அவருடன் இணைந்த விக்கெட் கீப்பர் லார்கான் டக்கர் 18 ரன்னில் யுஸ்வேந்திர சாஹல் சுழலில் கேட்ச் கொடுத்து வெளியேறினார்.